Acuérdese de nun dir

La presencia del presidente asturianu na misa de Cuadonga el día d’Asturies contravién el carácter aconfesional del país

santuario-de-covadonga_1641271-980x360

Milio Rodríguez Cueto, La Nueva España, 3 de septiembre

Señor don Javier Fernández Fernández, presidente del Gobiernu asturianu: el xueves que vien, 8 de setiembre, hai misa en Cuadonga. Acuérdese de nun dir. Dígo-ylo porque l’añu pasáu despistóse y fue.

De que tuvo un despiste toi seguru: usté pasaba perellí a lo “flâneur”, les manes en bolsu, como’l que mira ensin ver pal techu la basílica, la cabeza puesta n’otru sitiu, a saber si en Podemos o n’Álvarez Cascos, y, de golpe, ensin comelo nin bebelo, alcontróse en mediu la misa y, claro, col barullu de xente y, más tovía, por educación, ya nun salió. Toi seguru que fue asina, non porque seya usté socialista de raza y se-y suponga, en consecuencia, escoramientu a la banda del estáu laicu, sinón porque nun tengo ninguna dulda de que, nes múltiples lectures que tien fecho del Estatutu d’Autonomía d’Asturies, nun-y cayó embaxo que la palabra “religión” nun apaez nin una sola vez, cosa esperable, d’otra manera, porque la norma, sobre esi tema, díctala la Constitución, que pon que, n’España, “ninguna confesión tendrá carácter estatal”, asina que, de momentu, n’Asturies, tampoco.

Pa más desgracia, l’arzobispu d’Oviéu y Astorga, viéndolu presu del compromisu naquella situación inesperada, aprovechó pa reñilu. Yo eso llevélo mui mal, y como yo miles d’asturianos, fáigame casu. Porque usté, con distintos graos de satisfación, enchipamientu o disgustu según pa quién, represéntanos a toos, y, al reñilu a usté, l’arzobispu reñíanos a tolos asturianos: a los protestantes, a la comunidá xudía, a los musulmanes, a los despreocupaos, a los ateos y a los paganos, como un servidor. Claro: yo nun sé si, siendo neñu en Mieres, estudió usté na academia Lastra o colos dominicos. Si ye’l segundu casu, igual acepta con naturalidá qu’un clérigu lu reconvenga en público pa esplica-y cómo tien que facer les coses; pero si ye’l primeru, entenderá que lo llevemos mal (paso al plural, non por mayestatismu, sinon polo que ya-y comenté: a efectos políticos, usté ye un ente múltiple, pluripersonal) y que nun lo queramos aguantar una segunda vez: nun tamos fechos a ello, bobu?

Por eso, nun nos tien que garrar despistaos la misa de Cuadonga del xueves que vien. Tenemos qu’abrir l’axenda (o que nos la abra’l xefe de protocolu) y anotar nel día 8: “Cuandonga, non”. Y, ya de pasu, a la hora’l café, tenemos que-y lo recordar a don Pedro Sanjurjo, otru talu, que l’añu pasáu tamién acabó cola cabeza un metru perbaxo la mitra episcopal por escaecer que, como presidente del Parlamentu asturiano, tamién ye más nosotros qu’él. Al delegáu del Gobiernu español n’Asturies, don Gabino de Lorenzo, hai que lu tratar en singular porque, a fin de cuentes, ta puestu a deu y nun representa a naide. Si va a misa, nun nos lleva con él.

Pero ustedes, don Javier y don Pedro, sí: ustedes son nosotros, y como nosotros nun tamos toos d’acuerdu en dir, nun podemos dir. Y que nun nos engatusen col cuentu de los símbolos patrióticos. Nin el báculu nin la basílica son ningún símbolu que represente a Asturies. El símbolu, pa los que tengan pasión por estes coses, ye guerreru, non relixosu, y limítase a la cueva que corona’l saltu d’agua que, nun tiempu remotu, llamóse “onga”, fonte: Cuadonga, Covadonga. Pero tampoco eche muncho más pa con ello, don Javier, que la xente que combatió a los moros nesa cueva yeren separatistes que-y queríen pegar la patada al Gobiernu intregrador de Damasco: nacionalistes ensin conciencia de clase: lo peor. Igual hasta fue bona pena que nun ganare’l poder central la batalla. ¿Usté qué diz? ¿Por quién ta? ¿Polos independentistes o polos moros?

Da igual: eso ya nun tien arreglu. Lo importante ye que nun nos despistemos agora, el 8 de setiembre de 2016. A ver si la selmana que vien, por una vez, puedo empezar l’artículu escribiendo: “Javier Fernández cumplió”.

acuerdese-nun miliorodriguezcueto.wordpress.com/

 

Responder

Introduce tus datos o haz clic en un icono para iniciar sesión:

Logo de WordPress.com

Estás comentando usando tu cuenta de WordPress.com. Cerrar sesión /  Cambiar )

Google+ photo

Estás comentando usando tu cuenta de Google+. Cerrar sesión /  Cambiar )

Imagen de Twitter

Estás comentando usando tu cuenta de Twitter. Cerrar sesión /  Cambiar )

Foto de Facebook

Estás comentando usando tu cuenta de Facebook. Cerrar sesión /  Cambiar )

Conectando a %s

A %d blogueros les gusta esto: